忽然間眼前一黑，全身被塊黑布笠住，跟住覺得手腳一齊離地！一時間我心又喜，我心又慌，諗吓---------會唔會係上帝接我返天家呢？正在疑惑之際，覺得係有人抱住我，重走緊上樓梯添；你知我平時都好機警架，喺情況未明朗之前，都係靜觀其變好喲，所以又唔郁又唔叫住。跟住聽到開門聲、閂門聲，然後有人將塊布揭開，我眼前一亮，嘩！睇見有大有細一家三口企響我面前，重冇個識添，個個笑笑口對住我，口水都流晒出嚟。慘啦，知呢次落入奸人手中，而家秋風起矣，唔知會唔會……，哎，都係唔好諗咁多住啦！

所謂君子不吃眼前虧，都係唔好發難住，重即刻扮可愛熱情，當乜事都冇發生過，仲當佢哋係friend添。吓！個小朋友好似好鍾意我咁喎，又攬又抱，你知我咁大個仔，好少比人抱，周身都唔自在，冇法啦，唯有逆來順受。

一宿無話，第二朝一早，佢哋重整埋早餐比我食，又鮮奶又雞蛋又香腸，簡直當我係貴賓咁。食得又唔蹝嘛，食完至算啦！ 佢哋見我咁嚓得，居然早午晚三餐都奉上大魚大肉，慌死我唔滿意咁，老實講，有好多嘢陳老闆以前都未俾我食過！

如是者過左三日三夜，樣樣都幾好，唯一唔開心嘅就係佢地從來都唔帶我落街玩，好似坐監咁冇晒自由,食龍肉都假啦！。呢個時候使我更諗起以住嘅日子; 晚晚都同陳老闆漫步街頭，悠遊寫意嘅情景，不禁有啲神傷，真係好掛住舊時個屋企添！終於決定化悲奮為力量，要趁機逃走！

有一晚，小朋友替媽咪出去倒垃圾，度門冇閂實，剩返條罅；於是我把握呢個咁好嘅機會，用手抓開度門，靜雞雞走返落樓，好彩我重認得路，拿拿聲雞咁腳走返屋企，返到屋企點知重門深鎖，於是響門口度大聲咁吠， 陳老闆喺屋裏面聽到我嘅叫聲，立即開門；嘩！一見到陳老闆，真係仿如隔世，佢即刻抱起我，重猛咁錫我，我都回敬好多口水比佢，嗰一刻大家眼中真係帶有啲淚光。

事後我知道陳老闆喺我失蹤嗰日，冇晒心機，荼飯不思，而且好內疚，喲街坊都知到我唔見左，都黎問侯陳老闆，重義務幫佢喺屋村範圍內，貼滿晒尋找我”叮叮”狗嘅告示（當然有埋我幅靚仔相啦），而且重發出電郵通報全世界；怪唔知捉我上樓嗰位仁兄，< 呀唔係，係嗰個衰人>，見到咁嘅環境，而且通晒天，邊度敢帶我落街喎！
自此之後，陳老闆同我都寸步不離，大家更加珍惜呢份感情-------------話到尾始終都係自己屋企最好！各位老友，大家都應該懷著感恩的心，好好珍惜自己的每一天！因為幸福唔係必然！