我係一隻非常樂觀，非常為食，非常怕熱，又非常熱情的八哥。小生現年四歲有多，兩年前舊主人因為移民外國，所以將我送俾隔離街經營寵物用品商店嘅陳先生。陳老闆為人非常熱心，正直勤奮，可能是緣份啦！我哋大家都好啱key，佢對我也寵愛有加，好錫我，好信任我，好多時要出去送貨就將間鋪頭交低俾我打理！鋪頭大把嘢食，真係好唔得閒，好快體重與日俱增。雖然我知道太肥對我嘅身體會唔好，但冇法啦！「狗以食為先」，點忍喎！但係肥狗有肥福，我雖然唔算好靚仔，但勝在夠溫柔，夠善良，啲客人都好鐘意同我玩，特別係女仔，就算唔買嘢都會入嚟同我打個招呼，老闆都多得我唔少！（生意）

幾個月前，隔離街有家人搬入嚟，佢哋重有隻牧羊狗女添，而且重係好靚，好高貴個種，引到附近嘅同宗都排隊嚟探佢。我身為街坊一份子，當然義不容辭，落力招呼。點知有一次，佢唔知發乜嘢小姐脾氣，轉頭一口咬落我隻眼珠度。嘩！搞到我痛到入心入肺，金星直冒，眼花潦亂。好在返到鋪頭後，陳老闆幫我滴眼藥水，又搽藥膏，呵護備至。醫足幾個月至好返！事後諗返轉頭，覺得可能嗰位高貴小姐似靚行凶，嫌棄我又肥又矮又唔夠靚仔！算啦，佢唔識欣賞我嘅優點，係佢嘅損失；從此對呢位高貴小姐敬而遠之，怕怕囉！

晚晚老闆收鋪後，就同我去散步，風雨不改，每次都唔駛拖住我，大家都會走失。有時我行先，有時佢行先，都唔知幾free幾寫意！點知好景不常，有一晚，不幸嘅事終於發生啦！當晚我哋如常去散步，陳老闆自顧自行，我沿路又要招呼啲街坊友好。吓！轉過頭嚟就唔見陳老闆咯！我真係好擔心，唔知佢會唔會有乜意外。於是周圍去搵佢，連坑渠窿，老鼠窿，掘頭巷都唔放過。忽然間……

（待續）